• إدارة المدونة

  • الأقسام

  • الأرشيف

مواضيع قسم ‘مدن’

ليس بالضرورة ان تكون لاحس احذية ليحترموك ، مقال من بريدي

يناير
06

مقال رائع عن   وصلني في بريدي الاليكتروني ، شعرت ان تعميمه مفيد :

عندما اعلن اخر استطلاع ان شعبية الرئيس البرازيلي السابق لويس ايناسيو لولا دي سيلفا وصلت الى 90%، وهي اعلى نسبة بتاريخ البرازيل، فهي لم تأتي نتيجة تزييف او خوفا جماهيريا من نظام الحكم القائم، وانما جاءت من دولة ديمقراطية لكل مواطنيها، وجاءت هذه النسبة بالضبط لتعبر عن موقف جماهيري واسع لرئيس برازيلي استطاع بايمانه واخلاصه لشعبه ووطنه ان ينتزع حب شعبه، (المزيد…)

لا يوجد ردود

أخر موضوع كتبته المدونة الراحلة ،،نوارة أحمد فؤاد نجم ، من أحسن تهييساتها

أكتوبر
03

طبعا عشان محدش يفهم غلط ،، الراحلة يعني راحلة إلى بيتهم!!
موضوع لقيته لطيف وموجود في السندرة عندي ، قلت أنشره.
و دون أي تعديل او تصحيح ، يعني بعبله.وأخر موضوع يعني اخر موضوع قبل سفري يومها.

وبالمناسبة محدش كان يعرف انه عجبني واعتبرته هدية عيد ميلادي الموافق نفس اليوم :

تقرير الملاك الحارس عن اليوم الأول
الخميس 13 ديسمبر 2007م

الحقيقة انا مش عارفة ابتدي التوريطة دي من انهي ناحية؟
اولا: انا ما كنتش عارفة طبيعة ورشة العمل قوي كنت فاكراها دورة في حقوق الانسان وما استفسرتش قوي مينا قال لي تعالي دي عند جمال جيت، بس هي طلعت ورشة عمل عن دور الانترنت في مجال حقوق الانسان ويارب اكون بقى فهمت صح.
احسن حاجة بانت من اول يوم اني اتعرفت على ناس حقوقيين وناشطين من محافظات تانية ودول عربية تانية ولو اني احب اني اخد فرصة اتعرف عليهم وعلى مجال نشاطاتهم اكتر في الايام الجاية. وكمان اتعرفت على متطوع عنده 17 سنة.
اكتر حاجة ضايقتني اننا كان مفروض نبتدي تسعة وابتدينا عشرة وانا اصلا باصحى بالطبل البلدي وصحيت بدري عشان اجي في المعاد.
اكتر حاجة حسيت انها مريحة ان جمال اول ما دخل دب في وشنا كل حاجة بوضوح: احنا اسمنا الشبكة العربية لمعلومات حقوق الانسان، بناخد تمويل من كذا ومن كذا، اللي جايب لنا الكمبيوترات دي جهة كذا وكان ناقص يجيب لنا الفواتير والدفاتر وايصالات الكراسي والترابيزات، وهو قال ان اللي بتمول الدورة دي فورد، وانا مش باحب فورد، وقال الهدف هو تبادل الخبرات وما معناه يعني بعد ما تخلصوا الورشة عايزين تتطوعوا معانا اهلا وسهلا مش عايزين الباب يفوت جمل. ربك والحق انا اصلي بأقلق شوية من اي حاجة جديدة وبما اني فلاحة فانا باحب اللي يدب الكلام كده عشان احس اني مرتاحة وان كله على مية بيضا.
المحاضرة الاولى بتاعة محمود عبد الفتاح كانت حلوة قوي بس سريعة وطبعا بما اني ابيض يا ورد في القانونين المحلي والدولي كنت عايزة اسمع اكتر وكنت باسأل كتير بس فهمت ان مش مفروض في ورشة العمل دي يتم التوسع في مجال حقوق الانسان قوي بس ناخد فكرة وخلاص، وكل شوية يحنسوني ويقولوا لي ده في الدورة اللي فاتت بقى…انا شخصيا استفدت قوي من المحاضرة دي على رغم من اني كنت قاعدة خايفة لبعدين محمود يقول لي اخرسي بقى خليني اكمل…انا عادة الحاجة اللي ما اعرفش فيها يا اما اقعد ساكتة عشان استفيد – وده كان اختياري في الاول – يا اما لو حد نكشني بالاسئلة اقعد اسأل اسأل اسأل لحد ما اللي قدامي يرمي نفسه من الشباك،

ومحمود سألني في الاول عشان كان فاكرني نايمة، بس انا ندمته انه سأل بقى اكلت دماغه، بس عموما المحاضرة دي اثارت فضولي اني اعرف كل العهود والمواثيق واذاكرها واحضر مذكرة دفاع احتياطي على اي قضية جاية.
اللي فهمته من مينا ان المفروض يبقى كلنا عندنا فكرة اساسية عن مجال حقوق الانسان والانترنت فيه ناس عندها فكرة اكبر عن الانترنت ح تشوف ان يمكن فيه حاجات مش جديدة عليها وفيه ناس تانية ح يبقى عندها فكرة عن حقوق الانسان برضه ح تشوف ان فيه حاجات مش جديدة عليها بس اهم حاجة التفاعل مابين الطرفين وتبادل الخبرات.
طيب…بس انا برضه كنت عايزة زيادة شوية في المحاضرة الحقوقية، عشان فيه حاجات غامضة كتير…زي ان القوانين الدولية دي معمولة اساسا عشان تتبل ويشترب ميتها على الريق.
وبعدين كان فيه بيتزا وبيتي فور وبسكوت ونسكافيه والشاي بقى فتلة وفي كوباية بلاستك كان طعمه استغفر الله العظيم بس النسكافيه في كوباية بلاستيك كان مبلوع وفضلت احش واشرب ومحمود يتكلم…طيب يا عم ما انا كنت باسألك جوة جاي تكلمني دلوقت وانا بطني هي الحاجة الوحيدة اللي شغالة دلوقت؟

وبعدين احمد غربية ابتدى يتكلم عن كيفية عمل مدونة..المفروض اني في المحاضرة دي انا عارفة معظمها ولو اني استفدت ببعض التيبس في المحاضرة بس مش عارفة اذا كان الكل استفاد وللا لا؟ ندى كانت بتقول لي انها مش عارفة تكتب على المدونة ومش عارفة اذا كانت لقطت من احمد وللا لا لانها خجولة شوية. اظن ان كان احسن كل واحد يفتح واحنا قاعدين حساب على المدونة ويكتب بنفسه عشان يعرف هو فهم من احمد وللا لا مع انه عمل مدونة تجريبية وعملها قدامنا بس انا شخصيا مش بافهم الحاجة الا لما اعملها بنفسي، ومتهيالي الحضور كان لازم يطلبوا حاجة زي دي لو كانوا مش فاهمين قوي..عموما ح افترض انهم ما طلبوش لانهم فاهمين.
وبعدين كان فيه غدا من كوك دور وكنت شبعانة من ساعة الشاي والبيتي فور بس اكلت استخسار وخلصت كل الطبق عشان من وانا صغيرة ماما كانت بتقول لي عيب الواحد يسيب في طبقه حاجة.
الحقيقة بقى انا ما كنتش متوقعة كتير من محاضرة مينا لانه كان مش نايم بقاله تمانية واربعين ساعة وعينيه ابتدت تحمر وكنت خايفة مثلا يشتمنا او يعيط من قلة النوم، بس البرزنتيشن بتاعه مشي حلو قوي وانا شخصيا ومع اني مدونة بقالي سنة استفدت، ليه بقى؟ الواحد لما بيلزق كفه في وشه مش بيشوف كويس لما يبعد كفه شوية ممكن يشوف، مينا لما حط عمل المدونين المصريين في كلام ابتديت اخد بالي من حاجات عملناها وحاجات قصرنا فيها وحاجات محتاجة تعديل، يعني يا اخي الواحد ما كانش يعرف انه جزء من حاجة كويسة كده، الواحد كان دافس راسه في المدونة بتاعته ومدونات التانيين وما ابتدتش اخد بالي من التأثير الا لما ابتدى مينا يحكي تاني احنا كنا بنعمل ايه طول الفترة اللي فاتت، هو صحيح يع
ني اطنطت شوية على الحضور باللي حققه المدونين المصريين، لكن برضه ده ادانا فرصة نعرف اننا رغم تأثير المدونات في المجتمع المصري الا انها مش مؤثرة بالقدر الكافي في العالم العربي مثلا. ودي احد اهم محاور ورشة العمل دي اننا نشوف ازاي نعمل ثقافة تضامنية مع بقية الدول العربية اللي عندها نفس المعاناة.
انا انبهرت بالاستاذ سالم المدرس الاماراتي، حاجة لوز بجد، بقيت مش مصدقة نفسي على عدة اصعدة، اولا مهنة التدريس دي عندنا في مصر تدهورت لدرجة انها اتساوت بمهنة سواق الميكروباص مثلا، اني اشوف مدرس فاهم يعني ايه مدرس ومدى قدسية مهنته دي حاجة مبهرة، انه يصمم انه يرجع لشغله لان له دور مقدس هو مؤمن بيه ومش عايز مئات الالاف هو عايز يقف قدام الطلبة بتوعه ويدرس، انه يروح يعتصم في الامارات واعتصام في الامارات توازي عندنا في مصر اننا نقول فيه خمسة وعشرين مواطن رموا نفسهم من فوق برج القاهرة مرة واحدة، انا شايفة ان حملة مدرسين الامارات دي اهم حاجة نبتدي بيها وننسق جهودنا اننا نتضامن معاها. لانها، على بلاطة كده، ح تأثر بالايجاب قوي على مجتمعنا في مصر، على الاقل المدرسين المصريين ح يفهموا ان شغلانتهم دي مهمة مقدسة مش مهمة لم فلوس، والمجتمع عندنا ح يختشي على دمه ويفهم قيمة المدرس.
كان نفسي اسمع من كل واحد من الحضور زي ما سمعت من الاستاذ سالم، متهيالي دي كانت تبقى حلوة في التعارف بس لو كنا ابتدينا في المعاد. احنا لما بنتعرف على غيرنا اكتر بنعرف مشاكلنا احنا اكتر، يعني انا لاحظت، من خلال اليوم ده بس، ان من ضمن مشاكلنا في مصر اننا عاملين زي الامريكان، مش دريانين غير بنفسنا بس، الا مين صاحب فكرة اننا نتعرف على المشاكل العربية بشكل اقرب كده؟ دي فكرة لطيفة قوي وحاسة اني عايزة استفيد منها وان يتم التركيز عليها واننا نقرب من بعض اكتر، بس المواعيد تتظبط بقى.
ومش تنطيط والله بس فعلا التجربة المصرية في المدونات ضروري قوي تتنقل للعالم العربي، يجي واحد يقول لي العدد في اللمون اقول له ده ع الرصيف حضرتك، كل ما عدد المدونات زاد ده معناه ان عدد البني ادمين اللي بيتكلموا ويعبروا عن نفسهم زاد ودي حاجة كويسة لينا.
بس عيايزين بقى رز وخضار عشان دارين طلعت فيجيتارين.
نوارة نجم

 

 

لا يوجد ردود

Featuring WPMU Bloglist Widget by YD WordPress Developer