بحبك يا ستاموني ،، أقصد يا حملاوي
أغسطس
17
Hossam el-Hamalawy
كل الناس بتحب ستاموني ،، حتى محمود عبدالعزيز ، بس بصراحة ، أنا بحب الحملاوي أكتر.
ولو عملنا مقارنة سريعة بين ستاموني وحملاوي ،، اكيد حملاوي يكسب.
عرفت حسام الحملاوي تقريبا في 2001 أو 2002.
كنا أربعة ، انا وهوه ،، وإتنين أصدقائنا في الزمالك.
كنت سمعت عنه ،، شاب من الجامعة الأمريكية بيتفجر حياة وحيوية وحماس وكأنه شعلة نشاط .
هوه كمان كان قال انه سمع عني ،، قلقت قبل ما يقول سمع ايه ومن مين ، مش كل الناس بتتكلم عني كويس.
بس واضح أنه سمع عني كلام كويس " طبعا من ناس محترمة – اللي يتكلم عني كويس يبقى محترم – "رواه البخاري".
ما علينا.
بعد كده كل مصيبة اسمع عن حسام الحملاوي "مصيبة للحكومة طبعا" ، مظاهرة ، إضراب ، إعتصام ، والغريبة انه زي ما بيقولوا "مبيونش" في كل حتة ، وفي كل مكان وفي كل مناسبة ، رغم أنه مبيرساش على حدث أو مكان ، زي النحلة ، بس مع الفرق ، النحلة من الوردة دي للوردة دي ، وهوه من المسيرة دي ، للجرنال ده ، للمنظمة دي ، للاضراب ده !!
تلاقيه بيصور ، وبيحرض ، وبيكتب ، وبيشجع ، وبيدرب ، بينشر ، وبيحب ، وبيضحك ، وبيتخانق ، وووو
مش بقول لكم ،،، الحملاوي ده ينبوع حنان!!
بعد رجوعه من كاليفورنيا من اسابيع قليلة ،، شفته ، لسه الحملاوي زي ماهوه ،، أفكار واقتراحات ، وحيوية ،، كنت قرفان من شخص ما شويه ،، "حتكلم عنه بعدين عشان فيه ناس مقرفه بتصطاد في الميه العكرة" ، إتكسفت منه ،، الحملاوي اصغر مني وبيفكر في ايه ، كلها هموم عامة ، عايزين نعمل كذا للصحفيين ، وعايزين نعمل كذا للعمال ، وعايزين نعمل ايه للمصورين ،، وأنا بفكر في مشكلة تافهة !! وشخص تافه؟!.
حماسي رجع لي تاني.
مفيش أجمل من الحملاوي بالحطة الفلسطينية ، ياه ،، نموذج للشاب اللي بيسعى لتغيير الواقع المقرف ،و بيصدق اللي بيعمله، عشان كده ناجح .
حد عمره شاف ستاموني بحطه فلسطينية ؟؟!!
اشك.
يختفي يختفي ،، وفجأة يكلمك في التليفون ويقولك "ايه يا جميل حشوفك امتى؟" وبكل بساطة تحس انك سعيد أنك حتشوفه.
تخيلوا فرحة العواجيز بالفياجرا ، أو الأقرع بالشعر الصناعي أو الدميم بهيفاء وهبي ، أو عماد الكبير بسجن اسلام نبيه ، أو العامل بالثورة البلشفية ؟؟، دي فرحة اللي يقابل الحملاوي.
الحملاوي بيفكرني بشكري سرحان في فيلم أنت من الاحرار ياعلي . الحملاوي أصبح علي !!
بس علي بجد مش بتاع يوسف السباعي ، على بتاع اليسار ، بتاع المدونين ، بتاع بكره.
نصيحة اللي محبط أو متلخبط يقابل الحملاوي ،، يقعد معاه ، يسمع منه ،، يقرأ عرباوي ، يشوف صوره على فليكر .
ويبلغني بعدها.
والنصيحة دي مجانا لقراء المدونة ما عدا واحد.هوه عارف نفسه.
بالضبط يا حملاوي ،، هوه اللي انت شتمت فيه واحنا قاعدين.
ما علينا تاني ،،
عشان كل ده ، وغيره
بحبك يا حملاوي ،، ومبحبش ستاموني.
