مصر بجد

أخبرني محمد عادل “العميد ميت” وصديق له أن أمن الدولة وقوات كتير أغلقت شارع عبدالخالق ثروت تماما ومنعوا المرور لأي شخص منه.
فكرت هل الأمن بهذا الغباء؟
ما هو الضرر من مؤتمر لدعم عبدالمنعم ابو الفتوح؟
وهل يعقل أن يغلق الشارع فعلا؟ ممكن يمنعوا وقفة احتجاجية ، يحاصروها ، لكن يمنعوا المرور !!
تركت حقيبتي في المكتب ونزلنا معا.
روضة زميلتنا ، ومحمد عادل وصديقه وأنا. (المزيد…)

يوم الثلاثاء الماضي ، 22أغسطس ، بعد ماسهرت مع علاء ومنال وعمرو غربية وخالد منصور في اليوناني ، حوالي الساعة واحدة صباحا وانا مروح ، فوجئت بأمين شرطة في ميدان طلعت حرب بيجري ورا شاب وبيقول إمسك حرامي .. إمسك حرامي . طبعا شكيت على طول ومجرتش ورا "الحرامي" لكن غيري جري وراه ومسكوه ، اترددت ورجعت أشوف ايه الحكاية ، الناس كلها كانت بتضرب فيه ، بعنف ، وضمنهم بنت حوالي 16سنه ، وبعض الملتحين وأمين الشرطة.

سألت واحد من اللي بيضربوا : فيه ايه ؟

قاللي ان ابن الكلب ده "يقصد الشاب" مسك صدر البنت دي وهي ماشية .

فعلا كنت محتار ، الشاب عمل حاجة سخيفة ومقرفة ، صحيح.

لكن الضرب كان شغال بعنف .

وأنا طبعا ريحة بقي بيرة .

زعلان من اللي عمله الشاب ، وزعلان من الضرب اللي شغال بعنف.

ومش عايز اعمل مشكلة لو حد من الملتحين شم ريحة بقي.

بس مفيش فايدة ، خلاص الشاب اتضرب ولازم الضرب يقف ، الشاب عمره حوالي 19 سنه ، واضح من يوم ما بلغ ما لمسش بنت .

,اكيد مش حيعمل كده تاني.

اتحركت شويه على جنب ، وقلت بصوت عالي خلاص يا جماعة اكيد هوه حرم بعض الضرب ده ، كفاية كده .

وفعلا الناس بطلت تضرب إلا واحد سخيف قاعد يقوله ,, ترضاها على أختك يا وسخ يا كذا وكذا .

زعقت مرة تانية فيه وقلت له خلاص كفاية .

فعلا ساب الشاب .

والولد جري .. كان نفسي اكلمه ,, فعلا صعب عليا .. وكنت عايز اعاتبه وفي نفس الوقت اخفف عنه شويه العلقة دي خصوصا انه كان بيبكي ويقول خلاص اسف والمصحف ما حعمل كده تاني ! يعني اعترف ..

بس جري .. بسرعة وهوه بيبكي .. ملحقتوش .. كان نفسي ابكي معاه.