مصر بجد

تشارك في محل جزم؟

مفيش انسان خالي من العيوب ،،

ومفيش حد واخد منها حاجة ،،

ومفيش مستخدم انترنت خالي من الاسبام "السخام على راي آل غربية".

وكل يوم بكنس الرسائل من عينه كسبت لوتري اسبانيا ، وشاركني في ميراث عمتي من بوركينا فاسو ، وغيرها ،،

بس النهاردة جالي رسالة غريبة ،،

من شركة جزم ،، أحذية بالفصحى .

من غير تعليق انقلها لكم ..

والتليفون موجود لو حاد عايز يشتري جزمة او يشارك في إراحة اقدام الناس

We are Toscana Garments and Shoes established since 1991 with the primary objective of providing good quality Italian made leather shoes for men in UAE. During this period of time we have developed our self as one of the leading distributor company in UAE and Kuwait and have very strong presence in other parts of the Middle East countries like Oman , Qater , Saudi Arabia etc . .

We deal in good quality leather made Italian shoes for men in both casual and formal wear. We have a very wide range of collection to suit the taste of all the customer and we have with us a collection of around 600 models of men shoes and sandals with us to offer to the customer.

In our efforts to make the company global we are looking for some good partners with whom we can do good business and develop our presence. We are attaching some model shoes for you to look.

Hoping to do business with you in the near future.

Thanks and Best regards,

Alfred,

Toscana Shoes.

Mobile: 00971-50-6543775.

الصورة اهي

جزم: شارك في إراحة اقدام الناس

خبر قرأته في جريدة الراية القطرية يقول أن المدعو خالد الجندي سوف يقدم برنامج لدقائق على التليفزيون يوميا ،،،

بتوع التليفزيون إما ……. وإما ……. والأتنين حاجة عيب وكخة.

فمن يسمح لشخص يعتبر نفسه داعية ،، لكنه لم يكن أمين في شهادته أمام المحكمة في قضية أيمن نور ، ومتهم بالتحريض ضد السودانيين العزل في مذبحة المهندسين وبصراحة حد مينفعش لا داعية ولا ش يخ ,,,,

عبث

القاموس الغويط
كلمات نسمعها ، والكثير يعرفها.
لكنها لم تفقد اثارتها وغرابتها باي درجة.
يكون مثير لو كان لدي البعض اضافة لهذا القاموس الغويط ،،،
الكلمات بدون ترتيب :
بل ريقك
تسند المعدة
رم البدن
رم عضمك
روش طحن
بيكح تراب
أعورك في فارين؟
معاك حنطور
راكن الفيل بره
مختوم على قفاه
معلق قرون
قرني
عفر
قاعدين في بنزينه
ناس بيئة
عضمة زرقا
قرطسه
مُزة
بت لونه
فرس
فحت وردم
غسيل ومكواة
يتقنزح
متفرعن
بيلون
نخ
عجين ميلخبطوش
سمج
تنح
بقف
غتت
طريقك اخضر
طريق الكورنيش
كتاكيت
جوان
سوة
عرقوب
سيكو سيكو
غير زيت
أنأن
ربع جنيه ماشي "سواقين الميكروباس"
خبطه
شغال
روق الجمجمه
كبر دماغك
فوت
فشخ
ساسأ
إصحى للون
دبلة
قله
يعك
فقر دكر
تناكة
لماضة
أحه
اديله السكة
طيزين في لباس
فيها لا اخفيها
غلوش
هنج
دَلت
مدهول
فشخرة
هيس
ضابة السلك
مأشفر
يتأنزح
يتأنعر
فلأس
يصهين
منجه نفسه
إديها في التراوة
أنج جيه
عامل فيها فلة
راجل بيطة
في البلالة
طرمخ
كفتس
فركش
سيأ
سئسئة
يا عمر
أحيه
بوريه منك
ميه مالحة ووشوش كالحة
يهاتي
واد سوسه
يحمرأ
يتاغظ
أولعبان
شقلباظ
يفنيخ
حويط
ساهي
يتمرغ
ماشي يا حلاوة
إسم الله
عنده استغفر الله العظيم في اللامؤخذة
حلمبوحة
يحرن
ارر- اريت فيها
نبرت فيها
زلموكه
هبرة
يرقد عليها
سفيف
ينانأ
سفيف
يمزمز
تحت السواهي دواهي
أزعه
سكة
كاني وماني
زنبه
عامل فيها سبع رجالة
سبع البرمبه
يعلق ، يرسم ، يلون
يتبرجل
يلخبط كيانة
اتدحدر
سفلآة
حلوف
جحرج المسا
بار وعتب
عداك العيب وأزح
ظرابيني
حرجم
فرشح
يكرف
إقلب
اتحنطر
يعك
أشر
شبرأة
حاوريني يا كيكه

طيب أنا كنت جعان ، خلصت ميعاد شغل في نيويورك ، الشوارع حلوة ، والبنات أحلى.

ماء

الساعة اتنين الضهر.
أكل ايه .. أكل ايه ؟
رحت مطعم صيني ، غدا اسبيشيال "6،99 $" زي بعضه ، بس الغداء من غير مشروب والكوكا كولا ب 2 دولار !
إزازة المية بدولار ونص !
ما علينا من المية … "طبعا نسيت إن المية في نيويورك أغلى من الجعة" !!
خرجت من المطعم ، عطشان شويه بس جعان أكتر.
ضربت الـ " شوهان بو وذ شيكين بوهان – سبيسي".
كل الأكل الصيني ولو انت مش صيني ، بيشبه بعضه ..وطبعا انت متقدرش تكدبهم
أقل حاجة واحد حيطلع لك ويقولك وانت يعني بتعرف صيني ؟!
زي عندنا كده .. كل الاكل عبارة عن تسبيكه طماطم ، وعليها الخضار ..
كل الاكل المصري ,,,, إلا القليل.
ما علينا .
الـ " شوهان بو وذ شيكين بوهان – سبيسي" كان حراق جدا.
ميه يا ناس صدري حيولع …
كنت بعدت عن المطعم.
أي مكان فيه ميه يا خلق ؟ نار … نار ولاد الكلب حطوا قرن فلفل احمر "صيني" كامل وكان تايه وسط ال شوهان بو وذ شيكين بوهان – سبيسي !!!
طيب فيه كشك قريب ، غالبا عنده أزايز ميه .
– هاي ، ماي أي هاف أ بوتول اوف وتر بليز؟
– يس سير.
– هاو ماتش؟
– تو دولار فورتي .
دي مينفعش معاها غير احا بالعربي "صاحبنا بتاع الحجب- عبدو بتاع لا والنبي يا عبدو- حيفكر في قضيه بخصوص أحا دي"
بس انا عطشان ، ونار مولعة في صدري يا مؤمنين!
نيويورك اه حلوه.
والحياة لطيفة.
صعبان عليا نفسي" تو دولار فورتي" ده تمن كبدة فراخ في استوريل يا كلاب.
بس عطشان
وبقى موحوح
وإشتريتها.
2دولار و40 سنت، يعني 13 جنيه ونص. حار ونار.
الغريبة بقى أني بعد ما شربت ، حسيت أن احلى حاجة في الدنيا هيه الميه.
يا سلام ، مش خسارة في الازازة "بالمناسبة كانت 700 ملي" المشبرة.
المثير بقى
أني شربت حوالي نصها، وكنت سعيد وأنا ماشي في الشارع ماسك الأزازة.
شعور بالثقة.
والله بتكلم جد
ماشي بهز الازازة ، وكل شويه اخط شفطة ..
شعور جميل فعلا
لو فاكرين الشراب ابو استك منه فيه ، حتفهموا شعوري.
على كل حال ، حجيب الازازة معايا "وعد" وحخليها في المكتب للي عايز يتفرج عليها.
أصعب حاجة في الدنيا ..
لما تكون عطشان جدا … وعايز تشرب ميه.
ولما تكون شارب جدا .. وعايز تخرج ميه .
دنيا

تذكرت الشباب اللي بيبيعوا الهدوم أمام فلفلة في وسط البلد حين قرأت هذا الخبر ..

الباعة في نهج بومنديل يحتجّون

راجع من وسط البلد من يومين تلاتة.  حوالي 2الصبح ..
على الكورنيش ..تقريبا عند مستشفى السلام الدولي .. كان فيه حادثة …
المرور صعب و عاملين طريق عربية واحدة تمر منه .. جه دوري ، عربية هيونداي كسرت عليا عشان يعدي الأول .. سبته يعدي .. بس سائق العربية كان بطيئ .. اديته كلاكس
ظل بطيئ وقافل الطريق .. حاولت اعدي .. كسر عليا تاني  والعربيتين حكوا في بعض ..
مفيش تلفيات .. بس لآن عربيتي فيها عتبه .. وهوه عربيته مفيهاش .. الحكة بانت علي عربيته ..
لحد هنا وعادي .. بتحصل في احسن العائلات ..
ايه علاقتكم بحادثة عبيطة بتحصل بين عربيتين !!
جاي لكم في الكلام
بدا يشتم ويسب .. طنشته .. ومشيت
مزاجي كان عال وعنب
طلع ورايا وبرضه استمر يشتم
طبعا انا رديت عليه .. ربنا يرحمكم من لساني لما بفتح .. أنا اصلا من دار السلام وما أدراك
وصلنا للمعادي وراح كاسر ووقف بعربيته أمامي
وقف ..
نزل
نزلت
جاي ناحيتي وبدأ يشتم ويقيسني بنظرة
شكله حيبدأ ضرب
استعديت
فعلا قرر يضرب ..
ضربني في رجلي ..
في ثانية فكرت "اضربه وأوجعه ولا أترك اثر" (خبرة امن الدولة).
العساكر أتجمعوا وضابط صغير .. هوه استمر يحاول يضرب وأنا اضربه في بطنه وصدره أوجعه ولا أترك اثر
العساكر خلصونا من بعض ..
هوه لسه بيبرطم
انت متعرفش انا مين؟ "لسه فيه ناس عبيطة بتاعة انت متعرفش انت بتكلم مين!!!!"
لقيته خد الضابط على جنب .. وسمعت كلمة عقيد أمن دولة …
ضحكت بصوت عالي ومقدرتش امسك نفسي .. اتحركت ناحيته وقلت له وانا بضحك بس بغيظ .. طظ في كل الوسايط اللي حتجيبها ..
المثير ان الضابط الصغير . لقيته بيقول لصاحبنا .. طيب ممكن اشوف الكارنية ..
قلقت ..
قلت له .. بص احذرك من أي مجاملة على حسابي
!!!!!!!!
طلع مش ضابط .. ولا أمن دولة
فضلت اضحك
المباحث جت .. بعد نص ساعة
فهموا الموضوع من الضابط الصغير بتاع المرور
سألوا عايزين تعملوا محاضر لبعض
صاحبنا .. بتاع أمن الدولة المضروب جاب ورا
وانا  سكت .. ما انا خدت حقي
قال لهم خلاص بلاش
قلت لهم مفيش مشاكل
خدت الرخصة ومشيت
فكرت
ازاي انا اتعلمت من أمن الدولة .. انا زعلان  من نفسي

سوريا
مكنتش واثق أني حدخل سوريا ، لكن غامرت ، وذهبت ، أن تساهم في الدفاع عن سجناء رأي في سوريا ، هو شرف وحاجة مش مفروض تضيعها.رحت ، ودخلت ، وفوجئت.

بلد جميل وشعب رائع ، وشوارع نظيفة ، وقهاوي مذهلة" المقاهي هي عشقي الأول" ومطاعم محصلتش، لكن الحكومة يوك.
الناس
من أول لحظة حسيت أني بين ناس بيحبوني ، والواحد حتى لو في جهنم وفيه ناس بتحيه حيكون سعيد هناك.
ما علينا واضح السوريين زي اليمنيين بيحبوا مصر ، ورغم اني حسيت ان دمشق اجمل من القاهرة ، لكن كتير منهم بيحلم بزيارة مصر " أه لو اللي ما يتسموش يفهموا دور مصر"!!
من مطعم لمطعم ومن قهوة للتانية ، كل الناس بترحب بينا ، طبعا لم تكن فسحة ، لكن دي أماكن اللقاءات ، ده طبعا غير البيوت اللي زرناها للقاء اسر المعتقلين. وده مش حقرب منه لانه عمل حقوقي لم ينشر بعد.
البنات حلوة جدا ، وشيك ، الحجاب أقل "ممكن من القمع الموجه للاسلاميين " بس كتير منهم ملابسه فيها ذوق وشياكة احسن من القاهرة بكتييييييييير ، يعني شياكة وحلاوة طز في التخلف.
طبعا الشباب نفس الشيئ .
المقاهي
كتير وأجمل ونظيفة ، لسه الناس هناك بتهتم بالتفاصيل ، مفيش فرق بين المقاهي الكبيرة والصغيرة غير في السعر ، لكن لنضافة والجودة هيه هيه.
رحت قهوة هافانا ، والحجاز ، والقلعة ، والروضة طبعا ، مينفعش تروح دمشق ومتقعدش عليهم .. الحجاز بتفكرني بقهوة قشتمر جدا .. واسعة وعلى الشارع وناسها لطيفة جدا.
المثير ان الناس في المناطق القديمة فعلا عملوا حاجة هايلة ، كتير من أصحاب البيوت القديمة قرروا يفتحوها مطاعم أو قهاوي ، وهي فعلا جميلة وذوقها عالي ، واصبح عليها اقبال كبير ، وبكده كمان أصبح في قدرتهم يعتنوا بيها ، ومفيش حد يروح دمشق ولا يروح " بيت الجابري أو بيت ستي مثلا " نصيحة لا تفوتوها.

المحكمة ،
نظيفة جدا ، صحيح مفيش قانون ، والحكومة لاتهتم حتى بالشكل بالنسبة لتلفيق القضايا ، لكن شكلها حلو ، يعني مفيش عدالة لكن فيه محاكم حلوة وجميلة " فاكرين نكتة السوبر ماركت اللي مفيش فيه أي بضاعة لكن ايه رايك في النظام؟"!!!

حقوق الإنسان
مفيش ، فيه نشطاء شجعان ، لكن مفيش ولا منظمة مرخصة ، وكله شغال بشكل غير قانوني " بالنسبة للحكومة طبعا" وشغالين بقوة وجرأة شديدة ، لكن للاسف نفس الامراض ، خلافات وخلط شديد بين السياسية والحقوق ، مما يعطي للحكممة مبرر للهجوم عليهم .. لكن لو خدنا في الاعتبار ان الحركة جديدة ونص علنية ، نقدر نديهم العذر.

السينما
حولين الفندق كان فيه أكتر من سبع سينمات ، كلها درجة ثالثة ، يعني تدخل الساعة عشرة الصبح وتخرج حداشر بالليل ، ولسه الافلام الهندي والمصرية بتاعة الثمانينات ، وطبعا الافلام التركي "النص بورنو" ..
بالضبط بالضبط للي فاكر سينما الاهلي وايزيس والشرق بالسيدة ، والكواكب بالدراسة وعلي بابا ورويال في بولاق ابو العلا "لسه شغالين" والفونتازيو بالجيزة وغيرها .
طبعا كان نفسي ادخل ، لكن الوقت ، كان ضيق ، بس فعلا متعة تدخل تشوف افلام غريبة هندي وتركي ، ورخيصة ،، وطبعا ممكن تنام فيها وتدخن ، وتاكل وتشرب "كل حاجة" .

الانتخابات
كنت هناك من 16-20 ابريل ، والانتخابات كانت 22 ابريل ، دعاية واسعة وأكتر من دعاية مصر ، رغم انها نفس المسألة ، فلوس ونفاق وغياب للناس ، لكن المثير سرادقات المرشحين اللي فيها قهوة وأغاني ببلاش ومفتوحة طول فترة الدعاية.
وكلها احزاب بتاعة الحكومة ، ورجال اعمال بتوع الحكومة ، مفيش فرق بين شيوعي او بعثي أو رجل أعمال ،، كله تحت الطلب ، وكله حكومي ، يعني "كرامر ضد كرامر" .
هناك بعض المرشحين كانوا بيأجروا السينمات لعلم دعاية لهم او مؤتمرات .

الصحافة
مفيش برضه … تخيلوا دولة من غير صحافة حرة ,, أو حتى نص حرة ..
كله حكومي ، لكن الانترنت ماشاء الله بيستخدم بشكل كويس ، وعشان كده النشطاء والصحفيين والمعارضين دائما بيتكلموا عن الانترنت ومواقعة .. فهمت الان ليه الانترنت محجوب كتير من مواقعه على الشبكة.

ممكن أعمل تدوينة تاني سوريا والناس تستحق.
جمال

أولاد غربية: بحبهم أكثر أو أحترمهم أكتر؟؟

الشابين دول جم منين؟

سألت عمرو نفسه ، وبرضه سألت أحمد .. كده بكل وضوح انتوا جيتوا منين ؟

الاثنين أجابوا ،،

وقبلها سألت اصدقاء .. الشابين دول جم منين ؟

والناس ردت عليا ..

بس لسه مندهش .. وغالبا حفضل مندهش ..

سنين طويلة مقابلتش حتى واحد زيهم ، وفجأة يطلع لك اتنين ، وكمان اخوات !!

كبير وعندي أكتر من اربعين سنة ، وبتعلم منهم ،، قبل التدوين والمسائل التقنية ، بتعلم ازاي اكون حقاني وأزاي اكون زوق ، وأزاي تمارس الحق بشكل حاد وخصمك يخجل من أنه يفتئت عليك.

إتقابلنا في اعتصام ميدان التحرير للتضامن مع القضاة ، كنت مركز معاهم ، هما مخدوش بالهم ، ازاي بيصرفوا مع الاخرين ، أزاي بيعرضوا وجهات نظرهم في موضوع بشكل هادئ لكن واضح وقوي.

كنت براقبهم زي المخبرين ، وأكتر لكن عشان أتعلم منهم.

ساعات بتكسف منهم لما أعمل حاجة متعلقة بطريقة تربيتي كإبن لعيلة شعبية "يعني شويه هرجلة وهلهلي" ..

وساعات بخاف أخد موقف مش واضح او جرئ في موضوع لهم صلة بيه ..

إهتماماتهم اللي بعرف بيها زي البيئة أو حرية التعبير أو التسامح وقبول الأخر بتخليني اشعر اني لسه تلميذ في مدرستهم رغم عملي في حقوق الإنسان أكتر من 18 سنة .

حتى الحاجات اللي أعتقد مفكرتش فيها بشكل جد قبل كده تلاقيهم مركزين فيها بجد وموقفهم صح .. زي اللغة العربية والتدقيق الاملائي .

بختلف معاهم ساعات لكن من جوايا عارف انهم صح.

موقفهم في قضية القاضي مراد ، وقبلها في موضوع البهائيين ، وقبلها واثنائها قضية دعم القضاة والله العظيم ممكن يكون مرجع.

المشكلة أنهم زي القطر وزي الموس في مواقفهم وساعات ابقى عايز ادخل في مود الاحباط ، فبشعر بالخجل منهم ..

أصبحت مدمن مدوناتهم ، سواء للموضوعات اللي بيطرحوها ، أو لطريقتهم في عرض هذه الموضوعات.

لكن مع كل موضوع ومع كل لقاء يعاودني السؤال ..

الشابين دول جم منين؟

حد يجاوبني جواب اتوقف بعده عن السؤال

أعوذ بالله من الشيطان الرجيم
أعوذ بالله من المشروع العقيم
أعوذ بالله من النواب الحريم

أعوذ بالله  لشعوذات الحكيم
لاشتراكي من الإقطاع العديم
لوغد يصرح بان شعبا غشيم
بســـم الله الرحــمن الرحــيم
أعــوذ بالله من استعمار قديم
بربي لن يبقي من الإسلام سليم
دعوني من غشم ما يوما كنت غشيم
حسبي الأمين العام من السياد فهيم

الداعية الرحباني
زياد عاصي الرحباني

"من جريدة الأخبار اللبنانية"
 

إحنا مش تجار .. إحنا اتعذبنا وده حقنا

السجناء الاربعةالنهاردة  كان عندي جلسة هويدا طه ، وكان مفروض اروح محكمة باب الخلق للحضور كشاهد في قضية تعذيب.اتفقنا اني اروح جلسة التعذيب بما ان جلسة هويدا طه حنطلب تأجيلها لتصوير الملف.
انتظرنا حتى انتهي القاضي من نظر الجلسات العادية ، وبعدين يطلب سماع الشهود في قضايا التعويض عن التعذيب.
دي كانت قضية سنة 1994 لما الحكومة عذبت المحامي الاسلامي عبدالحارث مدني حتى الموت والمحامين احتجوا وعملوا اضراب ومظاهرة فأمن الدولة قبض على 49 محامي ومواطن وقعد يهلل ان الاخوان هما سبب الانتفاضة بين المحامين ، لكن لان الكلام ده مكنش مضبوط واليساريين كانوا هم المجموعة الانشط وقتها ، تم القبض على مجموعة اضافية حرقت كلام أمن الدولة لان الخمسة كان بينهم 2يساريين.
المهم اتقبض علينا ساعتها واتبهدلنا ، وواحد مننا احنا الخمسة رفع قضية  "احمد حلمي" ورحنا نشهد.
بعد القاضي ما خلص وبدا يسمع الشهود ، عرف ان شهود أحمد حلمي هما اتنين محامين ، أنا وسيد فتحي  قرر انه يسمعنا في الاخر.
انتظرنا حتى ينتهي وكانت فرجة .
بعض الاسلاميين المعتقلين سابقا كان دورهم قبلنا.
اندهشنا من أن بعضهم دخل للقاضي حوالي 7مرات على الاقل.
وعرفنا ان المجموعة كلها رافعة قضايا وكل واحد يعتبر صاحب قضية وكل واحد شاهد في قضية زميلة.
يعني سين من الناس يدخل كصاحب قضية ، وبعدين يدخل في قضية زميله شاهد وهكذا.
معاهم محامي واضح انه عقر او حلنجي شويه ، بيحفظهم وداخل خارج.
المهم الدور جه علينا .
القاضي اندهش شويه اننا مش ملتحين وبنقول كلام شكله حقيقي.
فسالنا انتوا بقى كل واحد فيكم حيشهد مع التاني ؟
سيد فتحي قاله شوف يا ريس احنا جايين شهود ، ومش رافعين قضايا ، والتعذيب حصل فعلا.
سيد خلص الشهادة وخرج .
جه دوري ..
قلت الشهادة فالقاضي بعدها سألني .. ايه الحكاية ؟
قلت له ..
اولا احنا مش تجار ومش رافعين قضايا عشان نشهد لبعض ..
احنا اتعذبنا لسببين ..
أولا بعض الضباط افتكرونا اسلاميين في 1994 ، فطبعا عذبونا،
وبعدين لما عرفوا اننا علمانيين ، عذبونا تاني عشان عشان بندافع عن الاسلاميين !!!
القاضي ضحك ، وكانها نكتة.
وعجبي.

مش عارف أنا أو احنا اللي في جيتو .. ولا الدنيا كلها عبث

الموضوع ده اتقله حرفيا من احد المواقع الحوارية أو المنتديات ..عن فوائد قرصة النملة !! أه واله العظيم .. والمثير ان شباب كتير تفاعلوا معه

حنقله زي ما هوه وعوضنا على الله !
—–

فوائد قرصة النملة!!!سبحان الله
بسم الله الرحمن الرحيم

6 .. قرصة النمله كأفضل وسيله للرجيم عندما تقوم النمله ( الانثى ) بتوجيه قرصتها للهدف المقصود ..فانها تفرز كمية من اللعاب الأيوني .. والغريب ان هذا اللعاب يقوم بحرق جميع الدهنيات الموجوده في العضو المقروص , مثلا , لو ان العضو المقروص هو الذراع فان اللعاب الموجود في مكان القرصه سوف يتنشر تدريجيا في كافة الذراع وبتالي سوف يقوم بحرق مانسبته 99% من الدهنيات التي توجد في هذا الذراع.
المشاركين في حوار :
دمعة الاحزان
ابن رشد الصغير
كسول
هادولي
الكاسح 2006
ميرو ام تي ام
المميز
دايم الشوق
دم الامارات

الوصلة عشان محدش يفتكر اني ببالغ :

الدعاة الجدد
بين المال والدين والكراهية

بالفعل الكثير والكثير يمكن طرحه لتوضيح حقيقة من أصبحوا يساهمون في تشكيل ذهن وطريقة تفكير الكثير من الشباب والمواطنين ، حين تتسم سلوكياتهم بالريبة
والتناقض ن ويبيحون لأنفسهم ما يمنعونه عن الآخرين ، وخلط الدين بالتجارة والتكسب المشكوك فيه!
أسفت كثيرا حين تكشفت لي هذه الحقائق وغيرها ، حيث كنت أتمنى أن أصل لعكس قناعاتي السابقة والحالية من أن بعض هؤلاء الدعاة يفضلون المال ودعاوى الكراهية على الدين أحيانا.