• إدارة المدونة

  • الأقسام

  • الأرشيف

مواضيع قسم ‘نفاق’

الدولار ،الختان ،وشغل الأمريكان … الآن أتحدث ، عن موضوع مقرف*

أكتوبر
11


عدة أحداث موضوعات كانت تستحق التعليق منا ، من الشبكة العربية لمعلومات حقوق الإنسان و اختلف الأصدقاء بشأنها ، البعض كان رأيه أن نصدر بيان صحفي بشأنها ، والبعض الأخر فضل أن نتجاهل الموضوع ،،
ورأيت بعد أن تعددت هذه الموضوعات أن اطرح موقفنا هنا.
الموضوع الأول مسألة حملة "فري كريم – http://www.freekareem.org/ ".
الموضوع الثاني ، حكاية الست بتاعة الختان و الأمريكان " http://www.alarabiya.net/articles/2007/09/18/39290.html"
الموضوع الثالث ، حكاية الست أو البنت دي ومؤتمر المدونين والحاجات المتعلقة به.

الموضوع الأول : موضوع حملة فري كريم : سمعنا من شهور عن بدء حملة لدعم كريم عامر وشفنا الموقع ،، واستبشرنا خير ، وكنا نتابع الموقع ، وشفنا الجزء الخاص بتاع التبرع لكريم ،، اندهشنا شويه وتوقعنا أن الناس دي تتصل بالاستاذ أحمد سيف مدير مركز هشام مبارك أو بكاتب هذه السطور ، أو بروضة زميلتنا في الشبكة واحنا بالتحديد محامين كريم واللي على علاقة به وخصوصا روضة.
محصلش ،، طيب هل فيهم حد بيحضر المحاكمة ؟ محصلش ، هل زاره أحد بالسجن ؟ محصلش ،، وتحديدا من زاره بخلاف هؤلاء هم " واحدة مصرية – http://wa7damasrya.blogspot.com/ زميلتنا ، وهويدا طه وزوجها الاستاذ رمضان.
الموضوع اصبح مستفز وسألنا كريم أثناء زيارته ، هل وصلك أي فلوس أو دعم من الناس دي ،، الشاب السجين اتضح انه لا يعلم عنهم شيئا ، بل ان هذه الحملة ومن يديرها لم يرسلوا له أي خطاب ،،
وبعض الخطابات التي كانوا ينشروها منسوبة اليه هي رسائل "مضروية" والاستاذة داليا زيادة – كما أخبرنا صديق – اللي حيجي كلام عنها بعد شويه كانت مصرة كجزء من الحملة تضيف جزء في الجوابات دي فيه شكر لها ، سواء الصحيحة أو المضروبة !!!!! يعني نصب وتفاهة.
من الأخر ، الناس دي جمعت فلوس على حس الشاب السجين وتاجروا باسمه ولم يستحوا !
وفي مرة علمنا انهم صرفوا اغلب الفلوس "كما زعموا" على عمل المظاهرات اللي بتدعمه والانشطة المختلفة ولم يتبقى سوى ألفين دولار وبعض الكسور ,, والكلام ده من شهور التبرع مازال مستمرا ،، هل وصل لكريم منهم مليم واحد منهم لالالالالالالا .
والمثير ان موضوع من موضوعات الست داليا مذكور فيه أنها لعبت دور رئيسي في حملة الدفاع عن كريم عامر . دي حاجة مقرفة
وعمرها هيه او الحملة دي ما جابوا سيرة مجهود المدونين المصريين "علاء ، مالك ، شاهيناز ، نورا ، ال غربية ، سلمى ، سالي ، وائل ، منال ، منعم ، جيمي هود ، سيزيف ، يحيي ، روضة ، مينا ، نوراه ,,,, وغيرهم من اللي كل واحد فيهم اشتغل اكتر من مؤسسة حقوقية كاملة ,,
يعني الست داليا عملت الحملة ،، ودول كلهم وغيرهم طبعا ،، بالنسبة لداليا وللحملة .. اصفار على الشمال.

الموضوع الثاني : الست بتاعة الختان والامريكان وثقافة السلام …"تنفع اغنية "( ختان الامريكان ترلم لم ،، وثقافة السلام ،، ترالالي"
المهم .
الست داليا باختصار ،، ناشطة حقوقية وكاتبة وصحفية ومدونة وعملت حملة ضد العنف ضد النساء وقادت حملة الدفاع عن كريم عامر ، ,,,, كل ده من حقها تقوله ، تكذب تهجص ، تنصب ,, هي حرة ,,, المهم بعيد عننا.
لكن الست داليا لسه بتستخدم اسمنا ، والصحفيين بيسألونا عنها وعلاقتنا بيها وبمؤتمر عايزة تعمله عن المدونين ، ولسه في موقعها التجاري بتاع الترجمة بتذكر انها تعمل مع الشبكة العربية العربية لمعلومات حقوق الإنسان !!!
طيب ايه الحكاية بالضبط ؟
تقريبا في مارس او ابريل 2006 عملنا اعلان عايزين مترجم او مترجمه ، ونشرناه على مصراوي ،، تقدم العديد من الشباب لنا ، منهم داليا زيادة ،، سالي زميلتنا ومديرة البرامج في الشبكة وقتها قررت تعين داليا.
وبدأت الشغل معانا ، نصف وقت ، ثم وقت كامل ،،
طبعا لم تكن في هذا الوقت سوى مترجمة "وفي حدود علمي مازالت مترجمة فقط ، وسيبك من حدوتة ناشطة دي" وفي مرة شاركت في مسابقة منظمة اسمها "همسة" وكتبت مقال ، وكسبت الفين دولار ،،
حقها مبروك ، وفرحنا بيها.
لكن ساعتها حصل ثلاث حاجات مهمة لم اقدرها وقتها :
1- انها شاركت في مؤتمر نظمته هذه الهمسة وهناك جالها لحسة الدولار وان حد اهتم بيها.
2- بدات داليا تزن علينا عشان نعمل علاقة مع المؤسسة دي "رغم انها تعرف سياستنا واننا لانتعامل مع الامريكان وخصوصا النوع ده ، لدرجة انها جابت لنا شاب اسمه جيسي قابلته وقال انه مدير همسه ويحب يتعاون معانا ،، بس انا اعتذرت بشكل لطيف له.
3- العديد من اصدقائنا حذروني من ان البنت دي تحدثت باسم الشبكة في هذا المؤتمر المشبوه "على حد قولهم في البداية ، وانا معاهم جدا بعد ما فهمت" وان المفروض افهم البنت دي حقيقة هذه المؤسسات التي تروج للحلم الامريكي والسياسة الامريكية.
كلمتها كتير ،،
واللي كان يهمني ان الشبكة تكون بعيدة وانها بتقوم بشغلها كمترجمة وخلاص.
بدا موضوع كريم عامر يسخن ، وكنت باخد بالي انها بتتصل بروضه اثناء التحقيقات في الاسكندرية مع كريم لتعرف الاخبار ، وتنقلها لاخرين ،، "ودي حاجة وسخة وغير محترمة ، لان شغل الشبكة وجهدها كأنه بيتسرق ولمصلحة مؤسسة تانية ومن موظفه في الشبكة" نبهتها ان ده لايصح وعيب ،،واكدت هي انها لا تقصد .

أيضا ، بعض المرات كنت اطلب منها ان ترد علي صحفيين بالنسبة للمعلومات عن كريم ،وكانت تقوم بذلك ، لكنها اكتشفت لذة ظهور الاسم في الصحف ، فراحت تغتنم الفرصة وتكلم الصحفيين باسم الشبكة و"تفتي" وطبعا لم اقبل
بذلك وكذلك سالي سامي ،، حدثناها عدة مرات ،، مفيش فايدة ،، البنت اتلحست ،،
وفي مرة عملت مناقشة معاها عن ليه بنرفض التمويل الامريكي والعلاقة بالامريكان لانها كل شويه تحاول تزقنا في السكة دي ، وتكلمنا كتير ،، وفعلا قالت لي في الاخر انها اقتنعت بكلامي ،، لكن الحاجة الوسخة انها رغم انها عارفة اني حتى لو لم تقتنع فلن اتدخل في قناعاتها الخاصة أو موقفها من الدولار أو الامريكان ،، وان كل ما يهمني أنها تقوم بشغلها كمترجمة ولا تتحدث باسم الشبكة دون تفويض واضح وأن تحترم قواعد العمل معانا.
الاستاذة ،، كانت بترتب لنفسها ومستمرة في خططها العبيطة ، بس الشبكة بتعمل لها اسم ، فقررت تظل وايضا أي فرصة مع أي صحفي ماشي .. داليا زيادة من الشبكة العربية قالت كذا ..
وكمان كنا شفنا شويه موضوعات منقولة من الشبكة على موقع اسمه ثروة ،، برضة بتاع سلام وضد العنف ومش عارف ايه.
يعني هيه بتستغل الشبكة بشكل حقير وبتضحك على شوية خوجات مش فاهمين حاجة .. والحجاب للي ميعرفش ،، بيعمل احلى شغل في الموضوعات دي .
في الاخر قررنا نفصلها ..
وفعلا حصل.
وهيه نفسها للامانة كانت رتبت حدوته ثروة وبتكمل موضوع الكونجرس الامريكي ده .
وتركت الشبكة.
فهمت بعد ما فصلناها انها تعرض عل روضة العمل معاها ،، روضة هي محامية الشبكة ،،
الست داليا بكل صفاقة تعرض عليها تسيب الشبك و تروح معاها في لغوصة الامريكان والختان ، وثقافة السلام.
روضة موجودة في الشبكة واحنا سعداء بها ،، لكن عايزنها تكون موجودة لانها حابة الشبكة مش لاي احساس بحرج او غيره.
الفكرة في فكرة سرقة العاملين او الكوادر ,, دي بداية عمل الست داليا مع بتوع الامريكان والختان وثقافة السلام.
ثم وحتى الان زعلانة عشان قلنا عيب لمن يتاجر بكريم عامر ،، بس زعلها شيئ وانهم يعبروا الواد المسجون بسنت امريكي أو مليم مصري أو جواب او زيارة ,,, مفيش احساس ومفيش رد.

الموضوع الثالث : افتتاح فرع لمنظمة "الكونغرس الأمريكي الإسلامي" والنكتة بتاعة الست داليا ,, ضحكا بس ملناش دعوة ،، هي حرة ولا شأن لنا مختونة أو غير مختونة .هيه كانت مترجمة وخلاص مشيناها .
اللي يهمنا انها واضح بتستخدم اسم الشبكة لان العديد من الصحفيين كل شويه يسألوا عن علاقتنا بها والمؤتمر اللي حتنظمة عن المدونين "باعتبارنا مهتمين بالمجال ده" وطبعا لانها حتشتغل على المدونين والعنف ضد المراة "ايه العلاقة .. معرفش".
اذا موقنا :
*هذه البنت او الست دي كانت مترجمة معنا ، فقط لاغير ولم تعمل صحفية من قبل.
* من الواضح انها تشعر بنقص ان تقول مترجمة ، فتعمد للكذب بأنها ناشطة وصحفية وهذا غير صحيح.
* لا شأن للشبكة العربية لمعلومات حقوق الإنسان من قريب أو بعيد بهذه المترجمة أو بالمنظمة التي تعمل بها أو بمؤتمرها الذي تحاول عقده .
* هذه السيدة ساهمت في حملة فري كريم بشكل غير محترم عبر عملها كطابور خامس اثناء عملها بالشبكة والحملة برمتها مشبوهه لجمعها المال باسم هذا الشاب والاتجار باسمه وتأليف رسائل ، دون ان يدعموه فعليا بأي شيئ ملموس.
* الشبكة العربية لم تتعاون و لا تنوي التعاون مع أي مؤسسة حكومية امريكية وهذا هو موقفها الواضح ولا مواقف مستترة لدينا.
* على هذه السيدة ان تكف عن استخدم اسم الشبكة وتزيله من موقعها التجاري .

أخيرا هذا الموقف هو موقفنا وحدنا في الشبكة العربية وبديهي انه لا يلزم احد سوانا.
حرر بمعرفتي
جمال عيد
11 أكتوبر 2007 أوروجواي

——

العنوان مقتبس من علاء سيف الغتت

لا يوجد ردود

Featuring WPMU Bloglist Widget by YD WordPress Developer